सोलापूर : प्रतिनिधी
रामवाडी परिसरासाठी विकासाचा नवा अध्याय सुरू झाला असून उपमुख्यमंत्री अजित पवार यांच्या विशेष निधीतून तब्बल १ कोटी रुपयांच्या दोन महत्त्वाकांक्षी सांस्कृतिक प्रकल्पांची उभारणी होत आहे. विश्वरत्न डॉ. बाबासाहेब आंबेडकर सांस्कृतिक भवन व साहित्यरत्न लोकशाहीर अण्णाभाऊ साठे सांस्कृतिक भवन या दोन भव्य योजनांचा शुभारंभ व भूमिपूजन सोहळा शुक्रवार, 28 नोव्हेंबर 2025 रोजी सायंकाळी 6.00 वा. पार पडणार आहे. दरम्यान डॉ. बाबासाहेब आंबेडकर सांस्कृतिक भवनासाठी ₹50 लाख, तर लोकशाहीर अण्णाभाऊ साठे सांस्कृतिक भवनासाठी ₹50 लाख अशी भक्कम आर्थिक तरतूद करून रामवाडी परिसराला कायमस्वरूपी सांस्कृतिक दिशा देण्याचा मानस व्यक्त करण्यात आला आहे.
या महत्त्वपूर्ण विकासकामांचा शुभारंभ विधानसभा उपाध्यक्ष अण्णासाहेब बनसोडे यांच्या शुभहस्ते होणार असून कार्यक्रमाचे ठिकाण रामवाडी, अंबाबाई मंदिराच्या पाठीमागे, प्रभाग क्र. 22 येथे निश्चित करण्यात आले आहे. स्थानिक नागरिकांसाठी हा ऐतिहासिक क्षण ठरणार असून या सोहळ्यास किसन जाधव, प्रदेश उपाध्यक्ष, राष्ट्रवादी काँग्रेस पार्टी व नागेश गायकवाड, कार्यसम्राट नगरसेवक, सोमपा, सोलापूर यांनी मोठ्या संख्येने उपस्थित राहण्याचे आवाहन केले आहे.