छत्रपती शिवाजी महाराजांचा अश्वारूढ पुतळा मजबुतीकरण आणि सुशोभीकरणाचे काम वेळेत करा : शिवप्रेमी
सोलापूर : प्रतिनिधी
सोलापूर शहरातील श्री छत्रपती शिवाजी महाराज चौक येथील पुतळा सुशभीकरण करण्याचे कामासाठी नाविन्यपूर्ण योजना सन 2022-23 अंतर्गत रक्कम रुपये 75 लाख इतका निधी मंजूर करण्यात आलेला आहे. त्यानुसार सदर कामाची रक्कम रुपये 63 लाख 29 हजार 494 इतक्या रकमेची निविदा काढण्यात येऊन सदर कामाचा मक्ता निश्चित करण्यात आलेला आहे.
सदरचे काम मक्तेदारामार्फत हाती घेण्यात आले असता सदर पुतळ्याचे सुशोभीकरण करणे पूर्वी पुतळ्याचे मजबुतीकरण करणे अत्यावश्यक असल्याचे दिसून आले. त्यानुसार सदर मजबुतीकरण करण्याचे काम तांत्रिक पद्धतीने कशा प्रकारे करावे लागणार आहे तसेच पुतळा सुशोभीकरणाचे काम कशाप्रकारे करण्यात येणार आहे याबाबत अवगत करण्यासाठी सोलापूर शहरातील प्रमुख शिवप्रेमी व संघटना पदाधिकारी यांना सोलापूर महानगरपालिकेच्या क्रांतीज्योती सावित्रीबाई फुले सभागृह येथे बैठकीसाठी निमंत्रित केले होते.
सदर बैठकीसाठी सोलापूर शहरातील सुमारे 25 प्रमुख शिवप्रेमी संघटनेचे पदाधिकारी उपस्थित होते सदर बैठकीत सदर कामाचे वास्तुविशारद शशिकांत चिंचोली यांनी पुतळा मजबुतीकरण व सुशोभीकरण संदर्भात पावर पॉइंट प्रेझेंटेशनद्वारे उपस्थितांना माहिती दिली. तदनंतर उपस्थितांनी मांडलेल्या मुद्द्यांबाबत चर्चा करण्यात येऊन त्यांच्या शंकेचे निरसन करण्यात आले.
सदर बैठकीत पुतळा मजबुतीकरण करण्याचे काम हे 19 फेब्रुवारी 2025 पूर्वी पूर्ण करणे बाबत व तदनंतर पुतळा सुशोभीकरणाचे काम चालू करण्याचे बाबत सर्वानुमते ठरले. हि बैठक पालिका आयुक्त यांच्या आदेशान्वये घेण्यात आली असून सदर बैठकी करता अतिरिक्त आयुक्त संदीप कारंजे व नगर अभियंता सारिका अकुलवार, उपअभियंता किशोर सातपुते, कनिष्ठ अभियंता अभिजीत बिराजदार, प्रशांत गुंड उपस्थित होते.
