मुख्यमंत्री लाडकी बहीण योजना, उत्पन्न आणि रहिवासी दाखला काढण्यासाठी गर्दी, दरमहा १५०० रुपयांचा लाभ

सोलापूर : प्रतिनिधी

मुख्यमंत्री लाडकी बहीण योजनेच्या माध्यमातून महिन्या काठी महिलांना १ हजार ५०० रुपये मिळणार आहेत. त्यासाठी २१ ते ६० वयो गटातील महिला (वार्षिक अडीच लाख रुपये उत्पन्न मर्यादा) या योजनेसाठी पात्र असणार आहेत. त्यासाठी अर्ज करण्यास सोमवार पासून प्रारंभ झाला आहे. सोलापूर जिल्ह्यातील जवळपास १४ लाख महिला योजनेच्या लाभार्थी होतील असा अंदाज आहे.

सर्व महिलांना योजनेच्या लाभासाठी अडीच लाख रुपये वार्षिक उत्पन्न असल्याचा दाखला काढावा लागणार आहे. लाभार्थी महिलांना १५ दिवसात कधीही त्यांच्या गावातील महा- इ-सेवा केंद्रावर जाऊन अर्ज करता येईल. या योजनेसाठी महिला महाराष्ट्र राज्याची रहिवासी असणे आवश्यक आहे. विवाहित, विधवा, घटस्फोटित, परित्यक्त्या, निराधार महिला, वयाची किमान २१ वर्ष पूर्ण व कमाल ६० वर्ष मर्यादा, अर्ज करणाऱ्या महिलांचे बँक खाते असणे आवश्यक आहे. अर्जदार महिलेच्या कुटुंबांचे एकत्रित वार्षिक उत्पन्न २ लाख ५० हजारांपेक्षा जास्त नसावे. अन्य विभागामार्फत राबविण्यात येणाऱ्या आर्थिक योजनेद्वारे दीड हजार रुपयांपेक्षा जास्त लाभ घेतला नसेल, ट्रॅक्टर वगळून चारचाकी वाहन नावावर नसेल अशा महिलांना या योजनेतून लांभ दिला जाणार आहे.

अर्ज भरण्याची सुविधा..

अंगणवाडी केंद्रात, बाल विकास प्रकल्प अधिकारी कार्यालये, ग्रामपंचायत व महापालिकेचे वॉर्ड ऑफिस, सेतू सुविधा केंद्र व महा- इ- सेवा केंद्रे येथे पात्र महिलांना योजनेचा अर्ज भरता येणार आहे

योजनेचे वेळापत्रक..

करण्याची सुरवात : १ जुलै

अर्ज करण्याची शेवट तारीख : १५ जुलै

प्रारूप निवड यादी प्रकाशित : १६ ते २० जुलै

प्रारूप यादीवर हरकत, तक्रार करणे : २१ ते ३० जुलै

लाभार्थी अंतिम निवड यादी प्रकाशित.

सर्व महिलांकडे कागदपत्र आहेत परंतु रहिवासी दाखला आणि उत्पन्न प्रमाणपत्र काढण्यासाठी सध्या सोलापुरातील महिलांनी विविध महा-ई-सेवा केंद्र, पोर्टल सुविधा येथे गर्दी केल्याचे चित्र पहावयास मिळते.