‘स्थापत्य २०२५’ प्रदर्शनाचे शुक्रवारी होणार उद्घाटन, बांधकाम व अंतर्गत सजावट विषयक माहितीचा खजिना होणार खुला

सोलापूर : प्रतिनिधी

असोसिएशन ऑफ कन्सल्टिंग सिव्हिल इंजिनिअर्सतर्फे भरविण्यात येणाऱ्या स्थापत्य २०२५ या बांधकाम व अंतर्गत सजावट विषयक प्रदर्शनाचे उद्घाटन शुक्रवारी (दि.२१) सकाळी ११ वाजता सोलापूर महानगरपालिकेसमोरील नॉर्थकोट मैदानावर जिल्हाधिकारी कुमार आशीर्वाद यांच्या हस्ते होणार आहे, अशी माहिती असोसिएशन ऑफ कन्सल्टिंग सिव्हिल इंजिनिअर्सचे अध्यक्ष प्रशांत मोरे यांनी मंगळवारी पत्रकार परिषदेत दिली.

‘स्थापत्य २०२५’ या स्थापत्य प्रदर्शनाचे प्रायोजकत्व मेटारोल इस्पात प्रा. लि. जालना यांनी घेतले आहे. स्थापत्य २०२५ च्या उद्घाटन कार्यक्रमास सोलापूर महानगरपालिकेचे अतिरिक्त आयुक्त संदीप कारंजे तसेच मेटारोल इस्पात प्रा. लि. (जालना) चे व्यवस्थापकीय संचालक डी. बी. सोनी यांची प्रमुख उपस्थिती राहणार आहे. स्थापत्य २०२५ प्रदर्शन २१, २२ आणि २३ फेब्रुवारी रोजी नॉर्थकोर्ट मैदानावर सकाळी १० ते रात्री १० वाजेपर्यंत सर्वांसाठी पाहण्यास उपलब्ध राहणार आहे.

यावेळी असोसिएशनचे अध्यक्ष इंजि. प्रशांत मोरे म्हणाले, स्थापत्य २०२५ प्रदर्शनाच्या माध्यमातून सोलापूरकरांसाठी विश्वासार्ह आणि अतिशय उपयुक्त माहितीची सुवर्णसंधी उपलब्ध करून देण्यात आली आहे. नव्याने घर बांधू इच्छिणाऱ्यांसाठी तसेच घराच्या अंतर्गत सजावटीसाठीची अतिशय उपयुक्त आणि आधुनिक तंत्रज्ञानाची माहिती स्थापत्य प्रदर्शनातून गेल्या ११ स्थापत्य प्रदर्शनातून देण्यात येते. या प्रदर्शनात जागा विक्रीचे विविध प्रकल्प, प्रमोटर आणि बिल्डर, गृह कर्ज देणाऱ्या वित्तीय संस्था, सिमेंट कंपन्या, कन्स्ट्रक्शन केमिकल्स, स्टील, प्लंबिंग आणि सॅनेटरी वेअर, इलेक्ट्रिक मटेरियल, बांधकामास लागणारी अत्याधुनिक यंत्रे आणि उपकरणे, दरवाजे आणि खिडक्या, रूफिंग मटेरियल, टाईल्स, घरातील अंतर्गत सजावट, फर्निचर, लँडस्केपिंग, सोलार एनर्जी, लिफ्ट असे एकूण ७० स्टॉल आहेत. या स्टॉलच्या माध्यमातून सोलापूरकरांना माहिती घेता येणार आहे. २१, २२ आणि २३ फेब्रुवारी दरम्यान होणाऱ्या या प्रदर्शनास सोलापूरकरांनी नक्की भेट द्यावी आणि लाभ घ्यावा, असे आवाहन असोसिएशन ऑफ कन्सल्टिंग सिव्हिल इंजिनिअर्सचे सचिव इंजि. मनोहर लोमटे यांनी केले.

या पत्रकार परिषदेस असोसिएशन ऑफ कन्सल्टिंग सिव्हिल इंजिनिअर्सचे अध्यक्ष इंजि. प्रशांत मोरे, उपाध्यक्ष इंजि. भगवान जाधव, सचिव इंजि. मनोहर लोमटे, खजिनदार इंजि. संतोषकुमार बायस, सहसचिव इंजि. जवाहर उपासे, सहखजिनदार इंजि. मनोज महिंद्रकर, माजी अध्यक्ष इंजि. अमोल मेहता, कार्यकारी समिती सदस्य इंजि. वैभव होमकर, इंजि. चंद्रमोहन बत्तूल, इंजि. सिद्धाराम कोरे, इंजि. काशिनाथ हरेगावकर, इंजि. गणेश इंदापुरे, इंजि. शैराज होमकर, इंजि. रामकृष्ण येमुल, इंजि. सुनील दूधगुंडी आदी उपस्थित होते.

प्रदर्शनातून होणार पर्यावरण जागृती

स्थापत्य २०२५ चे घोषवाक्य ‘सेव्ह एंव्हॉर्मेंट फॉर ग्रीन फ्युचर’ हे आहे. या विषयाची माहिती देणारा स्टॉलदेखील या प्रदर्शनात असणार आहे. स्थापत्य प्रदर्शनाच्या माध्यमातून पर्यावरण जागृतीही करण्यात येणार आहे, असे असोसिएशन ऑफ कन्सल्टिंग सिव्हिल इंजिनिअर्सचे अध्यक्ष इंजि. प्रशांत मोरे यांनी सांगितले.