सोलापूर जिल्ह्यात अवकाळी पावसामुळे 1598 हेक्टर फळबागाचे नुकसान, नुकसान भरपाई चा अहवाल लवकरच शासनाला सादर करणार जिल्हा कृषी अधीक्षक दत्तात्रय गवसाणे

सोलापूर : प्रतिनिधी

मागील काही दिवसांपासून सोलापूर जिल्ह्याला अवकाळी पावसाने झोडपले आहे.उन्हाच्या कडक्यापासून गारवा जरी मिळाला असला तरी शेतकऱ्याचे मात्र मोठे नुकसान झाले आहे. अवकाळी पावसाचा सर्वाधिक फटका हा पंढरपूर तालुक्याला बसला असून 1186.20 हेक्टर इतक्या फळबागेचे नुकसान झाल्याची आकडेवारी प्रशासनाकडून मिळाली.

जिल्हात आलेल्या अवकाळी पावसामुळे शेतीचे मोठ्या प्रमाणावर नुकसान झाले आहे.मोहोळ, पंढरपूर, मंगळवेढा माढा माळशिरस तालुक्यातील काही भागांत पाऊस झाला.या अवकाळी पावसाचा फटका शेतकऱ्यांना बसला आहे.द्राक्ष डाळिंब केळी आंबा या फळ पिकांचे मोठ्या प्रमाणात नुकसान झाले आहे हाता तोंडाला आलेले घास निसर्गाने हिरावून घेतल्याने बळीराजा हवालदिल झाला असून शासनाची मदत कधी मिळणार या प्रतिक्षेत आहे.या बाबत कृषी विभागाने अवकाळी पाऊस वादळी वारे गारपीट इत्यादी नैसर्गिक आपत्तीमुळे बाधित शेतीच्या नुकसानीचा प्राथमिक अहवाल सादर केला आहे. पंढरपूर तालुक्यातील 30 गावांना अवकाळी पावसाचा फटका बसला असून 1186.20 हेक्टर फळ पिकाचे नुकसान झाले आहे मंगळवेढा तालुक्यातील दहा गावांमध्ये एकूण 32.40 हेक्टर फळबागाचे नुकसान झाले आहे माढा तालुक्यातील 20 गावांमध्ये 119.90 हेक्टर पिकांचे नुकसान झाले आहे माळशिरस तालुक्यात वीस गावांमध्ये एकूण 101.80 हेक्टर पिकांचे नुकसान झाले आहे. मोहोळ तालुक्यातील 151.6 हेक्टर पिकांचे नुकसान झाले आहे. केळी,द्राक्ष,कांदा,डाळिंब,शेवगा,चिकू,आंबा,पेरू,सिताफळ या पिकांचे मोठ्या प्रमाणात नुकसान झाले आहे.

अवकाळी पावसामुळे उत्तर सोलापूर तालुक्यातील शेती पिकांचे मोठ्या प्रमाणात नुकसान झाले आहे. याचे पंचनामे त्वरित करून नुकसान भरपाई देण्याची मागणी मार्डी येथील शेतकरी नरसू भवर यांनी केली आहे.

अवकाळी पाऊस वादळी वारे गारपीट इत्यादी नैसर्गिक आपत्तीमुळे झालेल्या नुकसानीचा अहवाल सादर करण्याच्या सूचना शासनाने दिले आहेत तो अहवाल आम्ही सादर करणार असल्याची माहिती जिल्हा कृषी अधीक्षक दत्तात्रय गवसाणे यांनी दिली.