सोलापूर : प्रतिनिधी (अक्कलकोट)
अनंतकोटी ब्रम्हांड नायक अक्कलकोट निवासी श्री स्वामी समर्थ महाराज की जय या अबाल वृद्धांच्या जयघोषात संपूर्ण आसमंत दुमदुमला. श्री वटवृक्ष स्वामी महाराज मंदिर अक्कलकोट येथे श्री स्वामी समर्थांच्या १४६ व्या पुण्यतिथी निमित्त हजारो भाविक आज दिवसभरात समर्थांच्या चरणी नतमस्तक झाले. पहाटे ४ पासूनच श्रींच्या दर्शनाकरिता स्थानिक व परगावाहून आलेल्या भाविकांची गर्दी होती. सर्व स्वामी भक्तांचे दर्शन सुलभतेने होणेकरिता वटवृक्ष मंदिर समितीच्या वतीने दक्षिण महाद्वारालगत बॅरेकेटींगची सोय करून, भाविकांना उन्हाचा त्रास होऊ नये याकरिता कापडी मंडप उभारून विशेष सोय करण्यात आली होती.
४८ भजनी मंडळांनी आपली भजनसेवा अखंडपणे श्रींच्या चरणी समर्पित केली. धर्मसंकीर्तनात राष्ट्रीय व आंतरराष्ट्रीय स्तरावरील वक्ते व कलावंतांनी आपली सेवा सादर केली. पारायण सेवा देवस्थानच्या विश्वस्ता श्रीमती उज्वलाताई सरदेशमुख, भजनसेवा श्रीशैल गवंडी व धर्मसंकीर्तन सोहळा महेश इंगळे, ओंकार पाठक यांच्या अधिपत्याखाली पार पडले.
श्री स्वामी समर्थांच्या १४६ व्या पुण्यतिथी महोत्सवा निमित्त आमदार सचिन कल्याणशेट्टी, माजी आमदार सिध्दाराम म्हेत्रे, सचिव आत्माराम घाटगे, विश्वस्त महेश गोगी, उज्वलाताई सरदेशमुख, संपतराव शिंदे, दयानंद हिरेमठ, ॲड.प्रदीप झपके, विजय दास, गणेश दिवाणजी, मा. नगरसेवक बसलिंगप्पा खेडगी यांच्या सह असंख्य स्वामी भक्त स्वामी दर्शनाप्रित्यर्थ उपस्थित होते.
