सोलापुरात भिशी व फायनान्सच्या माध्यमातून २.६९ कोटींची फसवणूक, १३२ ठेवीदारांना दाम्पत्याने घातला गंडा
सोलापूर : प्रतिनिधी
रमेश अंबादास चिप्पा व त्याची पत्नी सुजाता चिप्पा, रा. खुशी रेसिडेन्सी, गीता नगर, अक्कलकोट रोड, सोलापूर अशी या गुन्ह्यातील आरोपी दाम्पत्याचे नाव आहे. यात फसवणूक झालेल्या शिवाजी लक्ष्मण आवार, रा. साईबाबा चौक, सोलापूर यांनी जेलरोड पोलीस ठाण्यात दिलेल्या फिर्यादीनुसार १ नोव्हेंबर २०२० ते ३० एप्रिल २०२४ या कालावधीत हा फसवणुकीचा प्रकार घडला.
भिशी चालवून आणि स्वतःच्या फायनान्स कंपनीमध्ये जास्त व्याजाचे आमीष दाखवून १३२ ठेवीदारांना दोन कोटी ६९ लाख १९ हजार रूपयांचा गंडा घातल्याप्रकरणी एका दाम्पत्या विरूध्द सोलापुरात पोलिसांनी फसवणूक व महाराष्ट्र ठेवीदार संरक्षण कायद्याखाली गुन्हा दाखल केला आहे.
ठेवीची रक्कम परत मिळण्यासाठी तगादा लावणा-या ठेवीदारांना केवळ भूलथापा देऊन चालढकल केली जात होती. ठेवीदारांनी सतत जोर लावला असता चिप्पा दाम्पत्याने, आम्ही आत्महत्या करतो आणि त्यास तुम्ही सगळे ठेवीदार जबाबदार राहतील, अशा धमक्या दिल्या. शेवटी शिवाजी आवार या ठेवीदाराने इतर ठेवीदारांना एकत्र आणून चिप्पा दाम्पत्याविरूध्द पोलिसांत धाव घेतली. या गुन्ह्याचा पुढील तपास शहर आर्थिक गुन्हे शाखेकडे सोपविण्यात आला आहे.
