सोलापूर : प्रतिनिधी
मी कोणतीही तक्रार दिलेली नसताना मोहोळचे तहसीलदार सचिन मुळीक यांनी वडवळ, तालुका मोहोळ येथील मराठा युवकांना चुकीच्या पद्धतीने कारवाईच्या नोटिसा दिलेल्या आहेत. त्यामुळे त्यांच्यावर कारवाई करावी अशी मागणी भाजप महायुतीचे उमेदवार आमदार राम सातपुते यांनी जिल्हाधिकारी कुमार आशीर्वाद यांच्याकडे केली आहे.
वडवळ या गावी मी अद्याप गेलेलो नाही. तेथील मराठा बांधवांनी मला विरोध केलेले नाही. माझी कुठलीही तक्रारही नाही. मी कोणाकडेही कारवाईची मागणी केलेली नसताना तहसीलदार मुळीक यांनी मराठा युवकांना नोटिसा पाठवल्या आहेत त्याचा मी निषेध करतो. अशा पद्धतीने नोटिसा काढल्यामुळे जिल्हाधिकाऱ्यांनी मुळीक यांच्यावर कारवाई करावी. मी मराठा समाजाच्या भावनेचा आदर करतो.
मी कायम मराठा समाजासोबत उभा राहणारा कार्यकर्ता आहे. त्यांच्याप्रश्नी मी विधानसभेत आवाज उठवलेला कार्यकर्ता आहे. भविष्यातही खासदार म्हणूनही मराठा समाजाला टिकणारे आरक्षण दिले पाहिजे, यासाठी मी त्यांच्यासोबत राहणार आहे. त्यामुळे चुकीची नोटीस दिल्याबद्दल तहसीलदार मुळीक यांच्या कारवाई करावी. तसेच ती नोटीस मागे घ्यावी, असे सातपुते यांनी म्हटले आहे.
