तरुणाची सव्वानऊ लाखांची फसवणूक, शेअर मार्केटच्या नावावर तरुणीने उकळले पैसे, अत्याचाराच्या गुन्ह्याची धमकी
सोलापूर : प्रतिनिधी
‘मी शेअर मार्केटमध्ये ऑनलाइन ट्रेडिंग करते, तू माझ्याकडे पैसे गुंतविल्यास चांगला नफा मिळवून देईन’ असे आमिष दाखवून सोलापुरातील एका तरुणाला पंजाबच्या तरुणीने तब्बल नऊ लाख २२ हजार रुपयाला गंडा घातला आहे. या प्रकरणी एमआयडीसी पोलिसांत गुन्हा दाखल झाला आहे.
जुलै २०२३ मध्ये फिर्यादी मिनाज रशीद हत्तुरे, रा. कर्णिक नगर या तरुणाची ओळख लवनीत कौर, रा. वाशी, नवी मुंबई हिच्याशी इन्स्टाग्रामवर झाली. शेअर मार्केटमधून कमी दिवसात चांगला नफा कमाविण्याची संधी असल्याचे आमिष त्या तरुणीने दाखवले. तिच्यावर विश्वास ठेवून मिनाज व लवनीत यांच्यात भेटीगाठी झाल्या. त्यावेळी संशयित आरोपी मूळची पंजाब, चंदीगढ येथील लवनीत कौर हिने फिर्यादी मिनाजला तुझे ट्रेडिंगसाठी अकाऊंट काढून देते, तुला चांगला नफा शेअर मार्केटमधून मिळेल, असा विश्वास दिला.
त्यानंतर ९ नोव्हेंबर २०२३ रोजी पहिल्यांदा मिनाजने त्या तरुणीला शेअर मार्केटमध्ये गुंतविण्यासाठी ऑनलाइन पैसे पाठविले. त्या वेळी एक-दोन हजार रुपयांचा परतावा त्याला पाठविण्यात आला. त्यांनतर १४ जानेवारीपर्यंत वेळोवेळी मिनाजने कधी ऑनलाइन तर कधी रोखीने पैसे दिले. मात्र, ज्यावेळी ती तरुणी शेअर मार्केटमध्ये काम करीत नसल्याची बाब समजली तेव्हा मिनाजने तिच्याकडे पैशांची मागणी केली. त्यावेळी तू जर मला पैसे मागितले तर तुझ्या विरूद्ध बलात्काराचा व विनयभंगाचा गुन्हा दाखल करीन’ अशी धमकी दिली, असे फिर्यादीत नमूद आहे. परंतु, आपल्याला फसवून त्या तरुणीने पैसे उकळल्याने मिनाजने पोलिसांत धाव घेतली. पोलिस उपनिरीक्षक विजय बनसुडे तपास करीत आहेत.
