अफजल खानाच्या उरुसाला विरोध न करणारे, विशाल गडाच्या अतिक्रमणावर न बोलणाऱ्यांनी आम्हाला शिवभक्ती शिकू नये : नरेंद्र काळे

सोलापूर : प्रतिनिधी

मालवण मधील राजकोट किल्ल्या वरील छत्रपती शिवाजी महाराजांचा पुतळा कोसळल्यानंतर विरोधक आक्रमक झाले असून त्यांनी या सरकारच्या विरोधात जोडे मारो आंदोलन करण्याचा इशारा दिला आहे. दरम्यान याबाबत शहर भाजपने रविवारी भर पावसात छत्रपती शिवाजी महाराजांच्या पुतळ्यासमोर आंदोलन केलं.

यावेळी छत्रपती शिवाजी महाराजांचा जयघोष करताना पुतळा कोसळण्यासाठी कारणीभूत असलेल्या लोकांवर कारवाई करण्याची मागणी करण्यात आली. यासह महाविकास आघाडीच्या वतीने करण्यात येणाऱ्या घाणेरड्या राजकारणाचा निषेध आंदोलनाच्या माध्यमातून व्यक्त केला.

भाजप शहराध्यक्ष नरेंद्र काळे म्हणाले, पुतळा पडला म्हणून आम्ही येथे शोक व्यक्त करत असून दोषींवर कारवाई व्हावी ही आमची प्रमुख मागणी आहे परंतु विरोधक या प्रकरणाला वेगळे वळण देऊन राजकारण करत असून महाराष्ट्रात अशांतता माजवण्याचा त्यांचा प्रयत्न सुरू आहे. अफजल खानाच्या उरुसाला विरोध न करणारे विशाल गडाच्या अतिक्रमणावर न बोलणाऱ्यांनी आम्हाला शिवभक्ती शिकू नये. या अशा संवेदनशील प्रकरणावर राजकारण करता एकत्रित आलं पाहिजे असं काळे म्हणाले.

शिवरायांच्या पुतळ्याची झालेली दुर्घटना निषेधार्थ असून संबंधितांवर योग्य ती कारवाई व्हावी परंतु याचं राजकारण करणाऱ्या, भांडवल करणाऱ्यांचा निषेध असो असे म्हणत महाविकास आघाडीवर भाजप नेते श्रीकांत घाडगे यांनी सडकून टीका केली.

या आंदोलनात श्रीकांत घाडगे, प्रा नारायण बनसोडे, राजकुमार पाटील, विशाल गायकवाड, विजया वड्डेपल्ली, इंदिरा कुडक्याल, विजय बामगुंडी, जय साळुंखे, राम मुटकीरी, श्रीनिवास करली, विजय पालकुतवार यांच्यासह भाजपचे कार्यकर्ते उपस्थित होते.