बंजारा समाजाला प्रतिनिधित्व देणार देवेंद्र फडणवीसांची ग्वाही, सचिन चव्हाण दक्षिण विधानसभा लढविण्यास इच्छुक

सोलापूर : प्रतिनिधी

भारतीय जनता पार्टी, तांडा वस्ती संपर्क अभियान महाराष्ट्र राज्य, पश्चिम महाराष्ट्र विभागाचे प्रमुख सचिन चव्हाण यांनी भाजपाच्या अधिकृत लेटर पॅड वर माहिती देत दक्षिण विधानसभा मतदारसंघातून निवडणूक लढविण्यास इच्छुक असल्याची माहिती दिली त्यांनी पत्रकात पुढील प्रमाणे माहिती दिली.

सचिन मोहन चव्हाण भारतीज जनता पक्षाचा २०१३ पासून सक्रिय कार्यकर्ता आहे. माझे आजोबा दलितमित्र, शिक्षणमहर्षी स्व. चंद्राम चव्हाण गुरुजी यांनी १९५८ मध्ये वंचित समाजाला व समाजातील शेवटच्या व्यक्तीला न्याय मिळवून देण्यासाठी मागास समाजसेवा मंडळाची स्थापना केली. संस्थेचे २२ शाखांमधून बहुसंख्य शाखा दक्षिण सोलापूर तालुक्यात आहेत. सध्या संस्थेमध्ये १५,००० विद्यार्थी शिक्षण घेत असुन जवळपास ६०० कर्मचारी कार्यरत आहेत. संस्थेच्या शैक्षणिक चळवळीच्या माध्यमातुन लाखो विद्यार्थ्यांना विद्यादानाचे कार्य केले असून आज संस्थेमध्ये शिक्षण घेतलेले विद्यार्थी शासकीय, खाजगी, सामाजिक, औद्योगिक आदी. विविध क्षेत्रात उच्चपदस्थ कार्यरत आहेत.

माझे आजोबा दलितमित्र, शिक्षण महीं स्व. चंद्राम चव्हाण गुरुजी व माझे वडील स्व. मोहन चंद्राम चव्हाण यांचा वारसा घेऊन मी आपल्या सामाजिक जीवनाची वाटचाल करीत आहे. गेली १२ वर्षापासून भारतीय जनता पार्टीमध्ये सक्रियपणे कार्यरत असून आजपर्यंत पक्षाने दिलेली जबाबदारी यशस्वीपणे पार पाडली आहे.

बंजारा समाजाच्या अडीअडचणी तथा समस्यांचे निराकरण करण्यासाठी सदैव तत्पर राहुन कार्य केले आहे. पश्चिम महाराष्ट्रामध्ये आजपर्यंत बंजारा समाजाला कुठेही राजकीय प्रतिनिधित्व करण्याची संधी मिळाली नाही. त्या अनुषंगाने बंजारा समाजाचे धर्मगुरु यांच्यासोबत चर्चा करुन त्यांच्या सुचनेनुसार व बंजारा समाजबांधवांच्या भावना लक्षात घेऊन तसेच राष्ट्रीय बंजारा परिषद व ऑल इंडीया बंजारा सेवा संघ यांच्या पाठींब्याने मी; २५९ दक्षिण सोलापूर विधानसभा या मतदार संघातून भारतीय जनता पक्षाकडून उमेदवारी मिळावी यासाठी ईच्छुक असल्याचे पत्र राज्य नेतृत्वाकडे सुपूर्द केला आहे.

मध्यंतरी उपमुख्यमंत्री देवेंद्र फडवणीस यांच्या मुंबई येथील निवासस्थानी अनेक समाजाच्या प्रमुखांची बैठक झाली यामध्ये महाराष्ट्रातील तमाम बंजारा समाजाच्या प्रमुख पदाधिकाऱ्यां समोर बैठक झाली यावेळी बंजारा समाजाच्या वतीने आगामी विधानसभा निवडणुकीत बंजारा समाजाला संधी मिळावी अशी मागणी केली यावर देवेंद्र फडवणीस यांनी नक्की संधी देऊ अशी ग्वाही दिली त्यामुळे सचिन चव्हाण यांनी उमेदवारी मागणी केली आहे.